Har du tenkt over om du har nokre usynlege medhjelparar? I så tilfelle, kven kan det vere? For dei som er pårørande til nokon som har vorte rusavhengige, så er det svært synleg for mange at dei usynlege medhjelparane er særs viktige.
Actis er ein paraplyorganisasjon for 38 ulike organisasjonar innanfor rusfeltet. Dei er godt synlege i ruspolitiske debattar, og tek mange politiske kampsaker og frontar dei på gode måtar. Det er det viktig at dei gjer.
Men – for dei som står i daglege kampar for å få tak i rusmiddel som dei kan bruke, så er Actis gjerne akkurat litt for langt unna til at dei kjenner folk som arbeider i Actis i Oslo med rusførebygging på ulike felt.
Kven er det då som kan hjelpe andre i rusomsorga? Ei sak er om du er innanfor ein behandlingsstad og får hjelp på den måten av frivillige, offentlege eller private aktørar.
Kven er dei usynlege medhjelparane som kvar dag tenkjer på sine familiemedlemer som kanskje akkurat no når du les dette lesarinnlegget vil ut av rusen sitt famntak? Dei kan vere nærare deg enn du trur. Det er likevel ikkje sikkert at du kjenner dei.
I høgtider kan det vere ekstra vanskeleg å ha nokon pårørande som har utfordringar med rus. Korleis kan vi som (lokal)samfunn gjere noko med det? Har du tenkt på det nokon gong?
Det er då det er så fint at Actis sine 38 medlemsorganisasjonar har sitt vidstrakte medlemsnett over heile landet. Det er fullt mogleg å melde seg inn som støttemedlem/medspelar eller kva ulike organisasjonar kallar sine støttespelarar. Å vise omtanke gjennom å anten teikne medlemskap eller støttemedlemskap er ein måte å vise dei usynlege medhjelparane at DU set pris på det arbeidet dei gjer.
Viss du eventuelt er usikker på kva organisasjonar som er medlemer i Actis, er det berre å klikke deg innom denne nettsida.
Frivillige organisasjonar synleggjer at nokon må gjere noko for andre viss vi skal få til endringar i samfunnet vårt. Det er difor vi med stor takksemd heiar på alle andre organisasjonar innanfor rusfeltet. Og – sender ein varm takk til alle pårørande rundt om i heile landet som gjer Noreg til eit varmare land for så mange.
